Pidgin Sextion - Dis Biutifu 9ja Babe Dey Do Beta Shoe Oooh

Dis days wimen no send weda some work na for onli men ooh, if wimen like di work, dem go shook head inside am ooh.

Nkiru Emodi

Oya make una con see Nkiru Emodi, di 31 years old accountancy graduate from Nigeria, di fine chenkess wey pack her certificate put for one corner con face dis shoe-maker work.

Nigeria na society wey di believe be say, wimen no suppose do some kain work, say na onli men suppose dey do dose jobs.

But Emodi no send wetin di society dey reason ooh, as she decide say to become shoemaker na her way to take put garri for her table, and also to give some other pipo work to do.

She talk say, "I no wan sidon for house make i nor dey do anytin". She also say, "I bin wan do somtin wey go bring moni, but also somtin wey go give oda pipo wey no get work, employment".

As he be say plenti pipo no get job for di kontri so, sendel dem dey dream to go skul, get certificate by thunder by fire, den get work for one ogbonge compani wey go stat to pay dem arm robber salary.

Emodi's hand-work

Our sista Emodi talk say, she sef bin follow look for dat office work wey go sama her plenti moni. But as "frustration" wan kill her on top say she no see work, no moni to take chop, buy pormade, go saloon do hair, or even to buy pants or bra sef to wear, na so she jejely run go find wetin she go happily dey do and also put garri for table before breast go fall.

She say, she "love shoes" no be small and anytime you call her to make shoes, "even for midnight" she no mind at all.

She say, pipo wey sidon dey wait until dem get one million Naira (1 miller or miter) ($2,800) before dem begin start business, say dem dey waste time ooh.

Emodi's Celebrity Products

To start dis shoe business, na ninety thousand Naira (90k) ($249) she take begin ooh, den gradually na so di moni begin dey bulku.